«نە؟ قايدا؟ قاشان؟» زياتكەرلىك ويىنىندا اتىراۋ تۇرعىنى جەڭىسكە جەتتى

اتىراۋ تۇرعىنى قۇرالبەك قارمىسوۆ رەسەيدىڭ بەلگىلى «نە؟ قايدا؟ قاشان؟» تەلەۆيزيالىق, زياتكەرلىك ويىنىندا جەڭىمپاز اتاندى. تەلەكورەرمەندەر اتىنان قاتىسقان ونىڭ سۇراعىنا ءبىلىمپازدار كومانداسى دۇرىس جاۋاپ بەرە المادى. ناتيجەسىندە, قۇرالبەك 530 مىڭ رۋبلگە يە بولدى. ودان بولەك, قازاق جىگىتىنىڭ سۇراعى ويىننىڭ جازعى سەرياسىنداعى ەڭ ۇزدىگى رەتىندە «حرۋستال ۇكىگە» لايىق دەپ تانىلدى. «نە؟ قايدا؟ قاشان؟» ويى­نى رەسەيدىڭ «ءبىرىنشى ارناسىنان» كورسەتىلەتىنى بەلگىلى. وتان­داسىمىزدىڭ سۇراعى بيىلعى جازعى سەريانىڭ فينالدىق باسەكەسىندە قويىلدى. ال بۇل سىندا ۆيكتور سيدنەۆ باستاعان ءبىلىمپازدار كو­مانداسى الەكساندر درۋز, بوريس لەۆين, ماكسيم پوتاشوۆ, مي­حايل ديۋبا جانە لەونيد تيمو­فەەۆ سىندى اككى ويىنشىلاردان جاساقتالعان بولاتىن. توپ ءمۇ­شەلەرىنە 11 – «حرۋستال» جانە 2 «گاۋھار ۇكى» تيەسىلى ەكە­نىن ەس­كەرسەك, كوماندانىڭ قانشا­لىق­تى كۇشتى ەكەنىن اڭعارۋ قيىن ەمەس. سوعان قاراماستان, ولار قازاق­ستان­دىقتىڭ سۇراعىنا دۇرىس جاۋاپ بەرە المادى. اتىراۋ مۇناي وڭدەۋ زاۋى­تىنىڭ 26 جاستاعى ينجەنەرى قۇرالبەك قارمىسوۆ زياتكەرلىك سايىسىنا بالا كۇنىنەن قىزىعادى ەكەن. بۇل تۋرالى ول: – مەكتەپتە وقىپ جۇرگەن كەزىم­دە ويىنعا تۇراقتى تۇردە سۇراق جىبەرەتىن ەدىم. بىراق ەشقايسىسى سايىس بارىسىندا قويىلعان جوق. ال ماعان ساتتىلىك الىپ كەلگەن سۇراقتى وسىدان ءبىر جىل بۇرىن جىبەردىم. شىنى كەرەك, ول تۋرالى ۇمىتىپ تا كەتتىم. سەبەبى, ءدال مۇندايدى كۇتپەگەن ەدىم», – دەدى. قۇرالبەكتىڭ ويىندا قويىلعان سۇراعى جاپونياعا قاتىستى بولدى. ياعني, «جاپونيانىڭ كەيبىر قالالارىندا ورىستىڭ «رۋچەەك» ويىنىنا ۇقساس «توريانسە» بالالار ءانى نە ءۇشىن قولدانىلادى؟», – دەگەن سۇراققا ءبىلىمپازدار: – كەي سايىس تۇرلەرىنە قازىلار القاسىن تاڭداعاندا قولدانادى, – دەپ جاۋاپ بەردى. ال سۇراقتىڭ دۇرىس جاۋابى بويىنشا, بۇل ءان باعدارشامنىڭ جاسىل شامى جانعان كەزدە زاعيپ جاندار ءۇشىن شىرقالادى. سەبەبى, «توريانسە» بالالار ءانىن ءار جاپون جاتقا بىلەدى. سوعان سايكەس, اۋەن ويناپ بىتكەنشە جاياۋ جۇرگىنشى جولدىڭ كەلەسى بەتىنە ءوتىپ ۇلگەرۋى كەرەك. اتىراۋلىق جىگىت بۇل دەرەك تۋرالى وتكەن جىلى جاپونياعا بىلىكتىلىگىن ارتتىرۋ ءۇشىن بارعان كەزىندە ەستىگەن ەكەن. وسى جەڭىسىنەن كەيىن تەلەباعدارلامانىڭ رەداكتورلارى وعان بيىلعى كۇزگى سەريانىڭ اشىلۋ سالتاناتىنا قاتىسۋ ءۇشىن ماسكەۋگە شاقىرتۋ جىبەرگەن. سول جەردە بىلىمگە قۇشتار جاس ينجەنەر وزىنە تيەسىلى «حرۋستال ۇكى» سىيلىعىمەن ماراپاتتالادى. ەلامان قوڭىر, «ەگەمەن قازاقستان».